Kjúklingur, sítróna og rósamarín ásamt góðu sinnepi, hunangi og olífuolíu er kombó sem getur vart klikkað.  Þessi grilluðu kjúklingaspjót eru hreint afbragð og fyrirhöfnin ekki mikil.  Það má vel bjóða upp á þessi spjót sem aðalrétt eða sem hluta af hlaðborði, einn af af nokkrum smáréttum og getur flokkast sem tapas réttur.  Eitt er víst að ég á eftir að endurtaka þessa uppskrift innan skamms svo góð er hún.

Uppskrift 

• 800 gr. kjúklingafillet
• 2 msk. rósmarín, ferskt og saxað smátt
• 2 hvítlauksgeirar, marðir undir hnífsblaði og skornir smátt
• 3 msk. sítrónusafi, ferskur
• 2 tsk gott sinnep
• 1 tsk. hunang
• 1 msk. olífuolía
• Svartur pipar
• Grillpinnar
• Salt

Gott er að byrja á að gera köldu sósuna. Ef þið notið trégrillpinna er mikilvægt að leggja þá í bleyti á þessum tímapunkti svo það kveikni ekki í þeim.

Blandið saman rósmarín, hvítlauk, sítrónusafa, sinnepi, hunangi, olífuolíu og pipar og hellið yfir kjúklingafillet og leyfið að marinerast í um það bil 10 – 15 mínútur.

Þræðið upp á grillpinna og grillið í 4 – 5 mínútur á hvorri hlið. Saltið og berið fram strax einfaldri kaldri sósu og t.d. perlubyggi með grilluðu grænmeti eins og þessi uppskrift hér

Einföld köld sósa

• 2 msk. grísk jógúrt
• 4 msk. majónes
• 1 msk. hunangs dijon sinnep
• 1 tsk. sítrónusafi
• 1 tsk. hunang
• 1 msk. smátt saxaður graslaukur
• Salt og pipar

Hrærið öllu saman og látið standa á meðan þið útbúið kjúklinginn.