Smákökubakstur er ómissandi hluti af aðventunni hjá okkur – yfirleitt bökum við 5 – 8 sortir og ekkert endilega alltaf þær sömu. Það er svo gaman að eiga heimabakað góðgæti að bjóða fjölskyldu, vinum og vinnufélögum á aðventu. Þessi uppskrift hefur fylgt okkur lengi og er ein af uppáhalds hjá táningnum. Sú var glöð þegar móðir hennar sló í þessar kökur í miðjum próflestri – hvað er ljúfara en að fá nýbakað góðgæti þegar maður tekur smá pásu frá skruddunum. En nú eru prófin búin og jólin handan við hornið – ég hlakka svo til 🙂

Uppskrift

• 300 gr. smjör
• 200 gr. sykur
• 1 egg
• 450 gr. hveiti
• 50 gr. haframjöl + meira til að velta kökunum í
• hindberjasulta

Skerið smjörið í bita og setjið allt nema hindberjasultuna í hrærivélaskál. Vinnið vel saman.

Rúllið deiginu upp í tvær pulsur. Skerið í jafna bita og gerið kúlur úr hverjum bita. Veltið upp út haframjöli og myndið litla holu í hverja kúlu.

 Setjið hindberjasultu á hverja köku.  Raðið á bökunarplötu og bakið við 180°C í 10 – 12 mínútur.