Þetta tómatmauk er vel þess virði að hafa aðeins fyrir því – dásamlegt i risottó með mozzarella, svo ekki sé minnst á pizzurnar sem verða vart samar með þessu mauki – nú eða sem grunnur í góða súpu eða hvað annað sem kallar á ómótstæðilegt tómatmauk. Möguleikarnir eru margir og ég er staðráðin í að gera margfalda uppskrift í sumar þegar tómatuppskerutíminn verður í hámarki – það er örugglega frábært að frysta þetta í hæfilegum skömmtum – notagildið er umtalsvert og hollustan ótvíræð.

Uppskrift

• 750 gr. tómatar, blandaðir
• 3 hvílauksgeirar, marðir undir hnífsblaði og skornir gróft
• ferskt tímían, nokkrar greinar
• 1 tsk. olífuolía
• 1 msk. salt
• pipar nýmalaður

Hitið ofninn í 180°C.

Setjið tómatana í eldfast mót, skerið þá stærstu í tvennt, en leyfið þeim minni að vera heilum. Bætið söxuðum hvítlauk, fersku tímían og olífuolíu saman við. Kryddið með salti og pipar. Blandið vel saman og setjið í heitann ofninn. Bakað í eina klukkustund.

Kælið tómatana í um það bil 30 mínútur.

Setjið sigti yfir skál, hellið tómötunum í sigtið og merjið þá í gegnum það með sleif.  Hendið hýðinu og því sem eftir verður í sigtinu (í safnhauginn), en setjið fallegt tómatmaukið í flösku eða krukku þar til þið notið það í risotto, á pizzu, súpu eða hvað annað sem ykkur dettur í hug.