Upprunalega kemur þessi uppskriftin úr gömlu Gestgjafablaði sem er dottið í sundur og því tímabært að koma henni á annað form.  Eins og svo margar uppskriftir sem fylgja manni lengi þá hefur þessi tekið svolitlum breytingum í gegnum tíðina – við höfum til að mynda skipt smjörlíki út fyrir smjör og minnkað sykurinnihaldið.  Tertan er best nýbökuð, en geymist vel í nokkra daga.  Hún verður svolítið tignarlegri ef maður notar lítið form það er 22 cm í stað 26 cm – en hvoru tveggja gengur.

Uppskrift

• 250 gr. smjör
• 200 gr. sykur
• 4 egg
• 250 gr. hveiti
• 1 tsk. lyftiduft
• 3-4 epli – helst græn
• kanilsykur eftir smekk

Byrjið á að afhýða, kjarnstinga og skera eplin í þunna báta.

Hrærið smjör og sykur vel saman og bætið eggjunum út í einu í senn og hrærið vel. Hrærið hveit og lyftidufti saman við blönduna.

Hellið heilmingnum af deiginu í smurt, hveiti stráð klemmuform (22 eða 26 cm).

Raðið eplum fallega ofan á og stráið kanilsyktri yfir. Setjið afganginn af deiginu ofan á eplin og sléttið vel úr. Raðið eplum ofan á og stráðið kanilsykri yfir.

Bakið við 150°C í 60-80 mínútur – fer eftir stærð formsins og ofninum sem bakað er í.  Stingið prjóni í kökuna til að vera viss hvort hún er bökuð.  Látið kökuna kólna í forminu a.m.k. til hálfs áður en hún er tekin úr því.