Ég var ekki alveg búin með rabarbarann í garðinum okkar svo ég ákvað að skella í nokkrar krukkur af sultu.  Ekki alveg þessa hefðbundnu rabarabarasultu í þetta sinn heldur bættum við jarðarberjum útí. Sultan er mjög góð með pönnukökum og vöfflum, en líka á ristarbrauðið á morgnana og ýmislegt annað.  Svo er líka svo gaman að eiga sultu í fallegri krukku til að færa vinum þegar maður fer í matarboð 🙂 Fallega skreytt sultukrukka er alltaf jafn vinsæl.

Uppskrift

• 1 kg. rabarbari
• 500 gr. jarðarber
• 800 sykur

Rabarbarinn hreinsaður og skorinn í 1 cm bita. Ég notaði frosin jarðarber og geri það oftast þegar ég geri sultu – þessi fersku fara í aðra rétti.  Jarðarberin skorin í bita ef þau eru mjög stór – annars er ekki þörf á því.  Sett í pott með sykrinum, kveikt undir, hitað rólega og látið malla við vægan hita þar til rabarbarinn og berin eru komin í mauk og sultan er farin að þykkna. Hrærið reglulega í pottinum, einkum er líða fer á suðutímann. Þegar sultan er tilbúin er hún sett í heitar, sótthreinsaðar krukkur og lokað vel.

Það er mjög einfalt að sótthreinsa krukkur – þær eru þvegnar vel og þurrkaðar, settar í 100 gr. heitan ofn í u.þ.b. 10 -15 mínútur.