Mikið er humar góður matur – sem einfalt er að elda svo úr verði veislumáltíð.  Með þessari uppskrift hef ég birt uppskriftir þar sem humarinn er grillaður á útigrilli,  bakaður í ofni, steiktur og notaður á pizzu, í súpu, risotto, já og allar eru uppskriftirnar svo góðar að þær kalla undantekningalaust á mjög sterk jákvæð viðbrögð. Í þetta sinn grilluðum við hann á útigrillinu og að sjálfsögðu var smjör, hvítlaukur, sítróna og steinselja með í för, enda nánast ómissandi þegar humar er annars vegar. Meðlætið var einfalt, salat, gott súrdeigsbrauð með hvítlaukssmjöri og kalt hvítvín – sannkallaður veislumatur.

Uppskrift (fyrir 2 sem aðalréttur eða 4 sem forréttur)

• 500 gr. humar í skel – við vorum með stóran og góðan humar
• 60 gr. smjör
• 3 msk. olífuolía
• 4-5 hvítlauksgeirar
• sítróna (börkur af hálfri lífrænni sítrónu) hinn helmingur í bátum borinn fram með
• 1 lúka fersk steinselja, söxuð smátt
• salt og nýmalaður pipar

Hreinsið humarinn, klippið upp í skelina, losið humarinn og lyftið honum að hálfu upp úr skelinni. Hreinsið burt svörtu görnina.

Bræðið smjörið við vægan hita og bætið olífuolíu saman við. Pressið hvítlaukinn og setjið út í smjörblönduna ásamt ríflega helmingnum af söxuðu steinseljunni og sítrónuberkinum. Kryddið með góðu salti og nýmöluðum pipar.

Pennslið humarinn með smjörblöndunni  Setjið humarinn á grillið, fyrst sú hlið sem er upp úr skelinni – grillið í um það bil 2 mínútur.

Snúið við, penslið og grillið áfram í 2 mínútur eða þar til humarinn er tilbúinn. Penslið með smjörblöndunni áður en þið takið humarinn af grillinu.

Gott er að smyrja gott súrdeigsbrauð með hvítlaukssmöri og grilla á útigrillinu í 1-2 mínútur á hvorri hlið.

Berið strax fram með einföldu salati, hvítlauksbrauði og köldu góðu hvítvíni.