Rib eye nautasteik sem er elduð við lágan hita í 10 klst. nánast bráðnar í munni. Það bregst ekki að þegar ég hef boðið upp á þessa steik í matarboðum þá umla gestirnir af ánægju.

Þetta er einföld eldamennska og hentug í matarboð.  Steikin býður þolinmóð í ofninum eftir að verða borin á borð þegar gestirnir koma og maður getur gefið sér tíma til að mingla í rólegheitunum.

Það er tvennt sem skal hafa í huga, annað er að vakna nægilega snemma til að koma steikinni örugglega í ofninn 10 klst. áður en gestirnir koma.  Hitt er að val á steikinni, leggið áherslu á að kaupa góða steik, beint frá býli eða í góðri sérverslun sem sérhæfir sig í að selja kjöt – við eigum nokkrar slíkar hér í Reykjavík. Ef kjötið er gott þá getur þú treyst því að steikin verður ein sú besta sem þú hefur bragðað.

Uppskrift f. 8 manns

• 2 kg. nauta rib eye
• 1 – 2 msk. olía
• 1 tsk. chili flögur
• 2 hvítlauksgeirar
• salt og nýmalaður pipar

Nuddið steikina með olíu, hvítlauk, chili flögum, pipar og salti.

Steikið kjötið við háan hita á útigrilli eða pönnu á öllum hliðum – eða þar til það er vel brúnað.  Tekur u.þ.b. 5 mínútur.

Setjið kjötið á grind í ofnskúffu og bakið við 65° C í 10 klst. eða þar til kjarnhitinn er um 60° í miðju kjötsins.

Í þetta sinn bárum við steikina fram með hasselback kartöflum, steiktu grænmeti og dásamlegri sveppasósu elduð frá grunni með nokkrum tegundum af bæði villtum sveppum og ræktuðum.

Sveppasósa uppskrift

• 1 sellerí stöngull
• 1 laukur
• 2 gulrætur
• 2 hvítlauksgeirar
• 1/4 chili
• 1/2 l. nautasoð (góður tengingur og vatn)

Skerið grænmetið smátt og steikið í olíu við lágan hita í  u.þ.b. 10 mínútur.  Hellið nautasoðinu yfir og látið sjóða undir loki í 30 – 40 mínútur.  Takið pottinn af hitanum og maukið með töfrasprota.

• 250 gr. blandaðir sveppir
• 25 gr. smjör
• 1 peli rjómi
• 1 tsk. sósulitur (má sleppa – en sósan verður óneitanlega fallegri á litinn)

Steikið sveppina í smjöri og blandið þeim saman við grænmetis-soðið. Bætið rjóma og sósulit út í og látið malla við hægan hita í 10 – 15 mínútur