Gróft spelt brauð hef ég bakað reglulega til margra ára. Upphaflega kom uppskriftin frá Sollu á Gló. Einfalt, gróft, hollt og gott brauð sem hefur þróast og breyst í gegnum árin. Galdurinn við þetta brauð er að hræra sem minnst í deiginu, einungis að blanda hráefnunum létt saman og þá verður brauðið létt í sér og dásamlega gott.

Uppskrift 

• 7 dl. gróft spelt
• 1 dl. sólblómafræ
• 1 dl. hörfræ
• 1 dl. graskersfræ
• 4 1/2 tsk. vínsteinslyftiduft
• 1 tsk. sjávarsalt
• 1 msk. sítrónusafi
• 2 1/2 dl. ab mjólk
• 2-3 dl. sjóðandi vatn

Ofan á brauðið set ég

• 1 tsk. af hverri frætegund sem notuð er í brauðið

Blandið öllum þurrefnunum saman í skál og hrærið þeim saman. Hellið vökvanum útí og blandið varlega saman.  Setjið deigið í brauð- eða formkökuform sem er klætt með bökunarpappír eða smurt með olíu.  Bakið við 200°C í 25 – 30 mínútur.  Leyfið brauðinu að kólna á rist og berið fram með góðu áleggi.