Vá hvað vikurnar þjóta áfram – það er að líklega merki um það hve lífið er skemmtilegt , sannkallaðr heilbrigðisvottur, er það ekki 🙂

Í dag er það þreytt en sæl kona sem hugsar um frið, hlustar á Lennon og smellir í eplaköku. Kaka þessi hefur verið þróuð síðustu vikur og er núna búin að ná þeirri fullkomnun sem sóst var eftir.  Þreytan sem ég mintist á er þó ekki svo mikil að ég ætla að smella mér í Þingvelli, ganga á eitt fjall, njóta nátturunnar, haustlitanna og góða veðursins sem skartar sínu fegursta í dag.

Á morgun er lítill fjölskylduárdegisverður þar sem þessi dásemd fær að prýða borðið.

Uppskrift 

• 2 epli
• 1 msk. dökkt romm
• 1 sítróna, safi og fínt rifinn börkurinn
• 2 egg
• 120 gr. sykur
• 1,25 dl. olía
• 150 gr. hveiti
• 1,5 tsk. lyftiduft
• 1 tsk. múskat
• 1 tsk. fennelfræ, fínt möluð í mortéli
• 100 gr. dökkt súkkulaði (70%), skorið í fremur smá bita

Hitið ofninn í 180°C

Blandið rommi, sítrónusafa og fínt rifnum berki af sítrónunni í skál.  Skerið eplið í litla bita og setjið út í skálina með romm og sítrónublöndunni. Blandið vel saman og setjið til hliðar á meðan deigið er undirbúið.

Þeytið egg og sykur mjög vel saman eða þar til blandan er ljós og létt.  Hellið olíunni rólega út í og hrærið vel saman.  Þegar hér er komið er best að nota sleif til að blanda hveiti, lyftidufti, múskat og fennelduftinu saman við.  Þá er eplunum og romm- og sítrónusafanum blandað rólega saman við og loks súkkulaðinu.

Hellið deiginu í pappírsklætt og/eða vel smurt formkökuform.  Bakið í 50-55 mínútur við 180°C eða þar til prjónn sem stungið er í kökuna miðja kemur hreinn út.

Kælið kökuna í forminu í um það bil 15 mínútur áður en það er tekið úr forminu.  Með því móti verður kakan mýkri.

Njótið með góðu kaffi eða kaldri mjók.