Brauðbakstur er heillandi og skemmtileg iðja, gróf, fín, með geri eða gerlaus, súrdeigs, lítil, stór, löng, stutt, bökuð í potti, í formi, á plötu eða steini – jafnvel grilluð- möguleikarnir eru endalausir. Oftast bökum við brauðbollur úr hefðbundnu gerdeigi á þessu heimili, en síðasta eina árið eða svo erum við líka svolítið að leika okkur með súrdeigs-brauðhleifa -þær tilraunir munu án efa rata hér inn síðar.
Þessar bollur eru grófar og góðar og í þeim er lítið ger. Þær fá að kaldhefast, það er vökvinn er hafður kaldur og deigið fær að hefast yfir nótt. Tilvalið er að smella í deigið á föstudags- eða laugardagskvöldi og baka bollurnar síðan á laugardags- eða sunnudagsmorgni. Nýbakaðar bollur með einföldu og góðu áleggi eru himneskur morgunverður og ómissandi á brunch-borðið.
- 350 gr. gróft spelt
- 250 gr. fínt spelt
- 5 1/2 dl. kalt vatn
- 1 tsk. salt
- 1 tsk. þurrger
- 1 tsk. hunang
- 1 dl. graskersfræ
- mjólk til að pennsla bollurnar með
Setjið allt í skál nema graskersfræin og hnoðið vel saman. Breiðið plastfilmu yfir skálin og látið deigið hefast yfir nótt. Morguninn eftir er deigið slegið niður og mótað í bollur – stærð þeirra fer eftir smekk – okkar eru oftast í minni kantinum, en þannig getum við fengið okkur margar bollur með mismunandi áleggi.
Bollurnar eru penslaðar með mjólk og dýft í graskersfræ. Bakaðar við 220°C í 15 – 25 mínútur – fer eftir stærð.
Krydd & Krásir 
Halló! 🙂
Er deigið látið hefast við stofuhita eða inni í ísskáp?
Í þessum skrifuðu orðum er þetta brauðbolludeig að hefast inni í ísskáp hjá mér, vonandi er það rétt, mér fannst að þar sem það er alveg heil teskeið af geri í þeim að þá myndi það alveg blása út ef það væri látið hefast við stofuhita. Ég er vön að gera New York times brauð með 1/4 tsk af geri og láta það hefast við stofuhita í um 18 klst.
Var að uppgötva þetta ótrúlega girnilega og vandaða matarblogg, ég á án efa eftir að prófa fleiri uppskriftir héðan.
Takk fyrir mig!
Kveðja, Þóra
Halló og kæra þakkir fyrir hólið 🙂
Ég hef ekki látið deigið hefast í ísskáp, heldur á köldum stað við opinn glugga í elshúsinu, en deigið á að kaldhefast svo ísskápurinn er örugglega líka í lagi.
Deigið er frekar blautt, ég hef alltaf smá spelt á borðinu þegar ég móta bollurnar til að þær verði meðfærilegri. Um síðustu helgi bakaði ég þessar bollur og uppgötvaði að ég átti ekki graskersfræ, notaði sólblómafræ í staðinn, bæði í deigið og síðan velti ég þeim upp úr sólblómafrænm áður en ég bakaði bollurnar – get mælt með því, bollurnar voru mjög góðar.
Gaman að heyra frá þér og gangi þér vel með baksturinn á morgun
Berglind