Mikilvægasta máltíð dagsins -morgunverðurinn ætti að vera snar þáttur í matargerð okkar, en flest erum við líklega á hlaupum á morgnanna og gefum okkur ekki mikinn tíma til að huga að fjölbreytni sem er svo skemmtileg.  Fjölskyldan er heldur ekki alveg sammála um hvað er góður morgunmatur og hvað ekki. Unglingurinn á heimilinu á sem dæmi erfitt með að skilja að móðir hennar neiti að kaupa Cherrios og kornfleks til að eiga alla morgna og vilji heldur útbúa hafragraut eða góðan morgun-boozt. En þegar heimagert múslí er til í krukku þá saknar engin Cheeriosins eða Kornfleksins. Dásamlegt með AB mjólkinni og enn betra með grískri jógúrt, góðu hunangi og ferskum jarðaberjum.

Grunnurinn að uppskriftinni er fengin í einni af uppáhalds matreiðslubók minni HOME MADE eftir hollenskan matarbloggarann Yvette Van Boen sem jafnframt rekur veitingastaðinn AAN–DE-AMSTEL í Amsterdam. Ég mæli með heimsókn  þangað ef þið eigið leið til Amsterdam – en athugið áður en þið farið að staðurinn tekur ekki við kreditkortum – ég fór flatt á því síðasta haust og hélt um tíma að ég yrði að vaska upp fyrir reikningnum.

En aftur að uppskriftinni – hlutföllin eru ekki heilög, allt er þetta smekksatriði, ræðst af því hvað er til í skápunum hverju sinni og hvað manni þykir best.

• 4 bollar tröllahafrar
• 2 bollar fræ, hnetur,möndlur, kókosflögur eftir smekk
• ½ bolli eplasafi – góður
• 2 – 4 tsk. hunang
• 2 bollar þurrkaðir ávextir eftir smekk

Skerið möndlur og hnetur gróft. Blandið saman höfrum, fræjum, hnetum og möndlum í skál. Leysið hunangið upp í eplasafanum og hrærið blöndunni út í hafrablönduna. Setjið smjörpappír á bökunarplötu og hellið blöndunni á pappírsklædda plötuna og dreifið vel. Bakið við 150°C í 25 mín og hrærið reglulega í blöndunni eða á 5 mínúntna fresti svo allt bakist jafnt og hnetur og kókos brenni síður.
Á meðan blandan er að bakast skerið þið þurrkaða ávexti niður í litla bita. Fallegt er að vera með litríka blöndu t.d. aprikósur, döðlur, trönuber, gráfíkjur, ljósar rúsínur.
Blandið ávöxtunum við hafrablönduna þegar hún hefur kólnað – setjið í fallega krukku og njótið.