Frábær forréttur eða smáréttur í grillveisluna.  Samsetning þessi er ómótstæðileg – það er ekki oft sem maður fær grillaðan mozzarella ost og með góðri hráskinku og djúsí brauði – marinerað í ferskum kryddjurtum, sítrónu, hvítlauk og góðri ólíu ummmm…..  svo ljúffengt.  Mæli sannarlega með þessum rétti í næstu grillveislu nú eða bara næsta grillmóment – það þarf ekki alltaf veislu til að gera vel við sig 🙂

Uppskrift fyrir 4 – 6 sem forréttur

• 1 gott snittubrauð (súrdeigsbrauð er langbest finnst mér – auðvitað smekksatriði)
• 4 kúlur mozzarellaostur
• 8 – 12 sneiðar  góð hráskinka
• 1 hvítlauksgeiri
• börkur af  tveimur sítrónum
• 2 hnefafylli af ferskum kryddjurtum t.d. rósmarín, basil, óreganó, graslaukur, steinselja
• 1/2 dl. olífuolía
• salt og nýmalaður pipar

Dressing

• 5 tsk sítrónusafi
• 5 tsk ólífuolía
• 5 svartar olífur – mjög smátt skornar
• 1/2 rauður chilli – smátt skorinn
• salt og nýmalaður pipar

Blandið saman olífuolíu, sítrónuberki og smáttskornum kryddjurtum og hvítlauk, smá salt og nýmöluðum pipar í stóra skál.  Skerið hverja ostakúlu í 6 – 8 bita og brauðið í þykkar sneiðar. Blandið ostinum og brauðinu út í skálina með kryddleginum.  Látið marinerast i 15 – 60 mínútur.

Blandið öllu sem á að fara dressinguna saman

Leggið trépinna í bleyti í vatn svo þeir brenni ekki þegar rétturinn er grillaður.

Vefjið hvern ostbita í hálfa sneið af hráskinku. Þræðið upp á trépinna til skiptis osti sem vafinn er í hráskinku og sneið af brauði.

Grillið þar til osturinn byrjar að bráðna og brauð og skinka taka lit.   Penslið með dressingunni áður en borið er fram.