Lambaframpartur með miðausturlenskum blæ

Miðausturlenskur lambaframparturLamb sem kryddað er með velristuðu og steyttu broddkúmeni og kóríander ilmar ekki bara dásamlega heldur er einnig hreint afbragð. Í kvöld smellti ég heilum framhrygg í pottofn, smurði með smjöri, kryddaði vel og leyfði honum síðan að malla á meðan ég skellti í eina þvottavél og lauk við skattskýrsluna. Talandi um skattskýrslur, magnað hvað það er orðið einfalt og fljótlegt fyrir allt venjulegt launafólk að skila þeim. Ég gleymdi mér reyndar, fékk frest og skilaði samt aðeins of seint – var svo upptekin við að njóta þess að vera til, vona að Hr. Skúli yfirskattamann taki við afsökunarbeiðni minni hér og nú!

En aftur að kvöldmatnum sem var með miðausturlenskum blæ þetta kvöldið.  Kjötið er einfalt að matbúa og getur vart klikkað, meðlætið uppáhalds-sætkartöflusalatið mitt, uppskriftina getur þú nálgast hér og einfalt kúskús með smátt skornum þurrkuðum aprikósum, pistasíuhnetum og ferskri steinselju.

Lambaframpartur - hráefniUppskrift (f. 4)

  • 1 lambaframpartur u.þ.b. 1,4 kg. með beini
  • 30 gr. smjör (mjúkt)
  • 2 hvítlauksgeirar, pressaðir
  • 1 msk. heil kóríander-fræ
  • 1 msk. heil broddkúmen-fræ
  • 2 msk. ferskt tímían eða 2 tsk. þurrkað
  • 1/2 tsk. þurrkuð chilifræ
  • salt og pipar eftir smekk

Hitið ofninn í 180°C.

Mýkið smjörið aðeins ef það er tekið beint úr kæli, en bræðið það ekki alveg.  Smyrjið frampartinn vel með smjörinu.

Ristið kóríander og broddkúmen fræin á heitri þurri pönnu, steytið fræin og blandið öllu kryddinu saman.

IMG_9795 Nuddið kryddblöndunni og pressuðum hvítlauknum vel yfir kjötið.

Setjið kjötið í ofnpott með loki og eldið í 180°C heitum ofninum í 1,5 klst.  Takið á ofnpottinn út, setjið 1-2 bolla af vanti í pottinn, hækkið hitann í 200°C og bakið áfram í 20 – 30 mínútur eða þar til komin er góð skorpa á frampartinn. Sigtið soðið og notið sem sósu ég gaf mér ekki tíma til að sjóða það meira niður, en það var mjög sterkt og bragðgott eins og það kom beint úr pottofninum.

Berið fram með soðinu ásamt sætkartöflusalati og góðu kúskús.

 

Birt í Kjötréttir, Miðausturlenskir réttir | Merkt , , | Færðu inn athugasemd

Krydduð gulrótar og eplakaka

img_8990Vá hvað það er þakklátt að sjá sólina á þessum fallega sunnudegi.  Reyndar kann ég vel að meta skammdegið, finnst dásamlegt að kveikja á nokkrum kertum um leið og ég kem heim úr vinnunni, sem undanfarnar vikur og mánuði hefur verið frekar seint á daginn.  Hver árstíð hefur sinn sjarma og alltaf þegar ný árstíð fer að gera vart við sig hlakka ég óendanlega til, sannfærð um að einmitt þessi tími ársins sé minn uppáhalds. Nú er það vorið sem er um það bil handan við hornið og vá hvað það er þakklátt.  Ég er búin að fara yfir fræsafnið mitt og ætla í dag að útbúa lista yfir fræin sem vantar. Hef um leið lofað sjálfri mér að hafa þetta einfalt í ár, rækta sjálf örfáar tegundir að kryddi og salati, en kaupa aðrar plöntur forræktaðar 🙂  Vonandi tekst mér að standa við það.

Bjartur og fagur sunnudagur eins og þessi í dag kallar á nýbakaða köku. Hér er ein mjög góð, gulrætur, epli, valhnetur og krydd. Hugmyndin er komin frá Honey and Co. uppáhalds veitingastaðnum mínum í London, hvet ykkur til að kíkja til þeirra ef þið eruð á ferðinni þangað, hér er tengill á staðinn.

Uppskrift 

  • 80 gr. valhnetur
  • 2 dl. bragðlítil olía t.d. sólblómaolía
  • 180 gr. sykur
  • 2 egg
  • 100 gr. hveiti
  • 75 gr. heilhveiti
  • 1 tsk. kanill
  • 1 tsk. engifer duft
  • 1 tsk. matarsódi
  • 3 rifnar gulrætur
  • 1 epli, kjarnhreinsað, afhýtt og rifið

Hitið ofninn í 180°C.   Ristið hneturnar i heitum ofninum í u.þ.b. 10 mínútur. Kælið þær og saxið síðan gróft.

gulrotar-og-eplakakaHrærið olíu og sykur vel saman. Bætið eggjunum út í, einu í senn og hrærið saman þar til blandan fer að líkjast majónesi.

Blandið þurrefnunum saman, það er báðum tegundum af hveiti og kryddinu. Blandið saman við eggjahræruna og hrærið saman.  Blandið loks rifnum gulrótum, eplum út í og loks söxuðum valhnetum og hrærið varlega saman.

Hellið deiginu í velsmurt formkökuform (okkar form er 28 cm langt)  og bakað við 180°C í 50 – 55 mínútur eða þar til prjón sem stungið er i miðjuna kemur hreinn út.

Leyfið kökunni að kólna í forminu í 15 – 20 mínútur áður en hún er tekin úr því.

Berið fram með góðu kaffi eða kaldri mjólk.

 

Birt í Bakstur | Merkt , , , , , , | Færðu inn athugasemd

Gúllassúpa

img_8928Kraftmikil, heit og hreint dásamleg eru réttu lýsingaorðin yfir þennan rétt sem nánast sér um sig sjálfur – tja eða svo gott sem.  Þetta er réttur sem ég  upphaflega fann í eld-, eldgömlum Gestgjafa fyrir mörgum árum og ég hef eldað reglulega síðan, en hefur að sjálfsögðu breyst og þróast í gegnum árin. Nú var komið að því að aga eldamennskuna, mæla, skrá og mynda og færa svo yfir á þennan miðil – enda nokkrir sem hafa beðið eftir því að geta nálgast þessa uppskrift. Ungverska paprikukryddið er bragðmikið og svolítið sterkt, gefur súpunni töluvert bit – sem er svo gott á köldum vetrarkvöldum.  Þetta er upplagður réttur til að elda fyrir stóran hóp matargesta.  Þessi réttur hentar vel t.d. þegar haldið er í fjallgöngu eða skíðaferð, þá er um að gera að græja og gera áður en lagt er í hann, fullelda réttinn, kæla vel og hita svo upp þegar komið er heim nú eða taka með á staðinn og hita á prímus úti eftir góðan dag á fjöllum.  Með súpunni er fátt betra en góðar heimabakaðar bollur t.d. þessar hér.

Uppskrift f. 8 manns

  • 1200 gr. nautagúllas
  • 1 stór eða 2 minni laukar
  • 1 rauð paprika
  • 1 græn paprika
  • 600-700 gr.kartöflur
  • 3 gulrætur
  • 2 msk. broddkúmen*
  • 2 msk. ungversk paprika (ef ekki til notið þá venjulegt paprikukrydd og örlítið af chili)
  • 2 vænar greinar ferskt rósmarín (eða 2 msk. þurrkað)
  • 3-4 msk. ferskt oreganó (eða 2-3 tsk. þurrkað)
  • pipar og salt
  • 2 hvítlauksgeirar
  • 150 gr. rjómaostur
  • 1 dós niðursoðnir tómatar
  • 3 msk. tómatpúrra
  • 1/2 l. sterkt og gott nautasoð (kraftur og vatn)

Skerið lauk og paprikur fremur gróft.  Flysjið kartöflurnar og gulrætur og skerið í hæfilega munnbita.  Saxið ferska kryddið, en geymið aðra rósmarín greinina þar til rétturinn er borinn fram. Setjið í stóran leir- eða pottjárnspott og kryddið með öllu kryddinu. Veltið aðeins til í pottinum svo kryddið nái til allra bitanna.

gullas-supaSetjið hvítlauksgeira, rjómaost, niðursoðna tómata, tómatpúrru og  hluta af nautasoðinu í blandara og maukið vel saman.  Hellið maukinu og afgangnum af soðinu yfir kjötið og grænmetið.  Setjið þétt lok á potinn og bakið í ofni við 180°C í 2 til 2,5 klst.

Leggið fersku rósmarín greinina sem þið geymduð ofan á súpuna áður en hún er borinn fram.

Berið fram með góðum brauðbollum t.d. þessum hér.img_8925-1

* Best er að nota heil fræ, þurrista þau á heitri pönnu og steyta í mortéli.

Birt í Kjötréttir, Súpur, Vinsælar uppskriftir | Merkt , , , | Færðu inn athugasemd

Kryddjurta- og kotasælubollur

Kotasælu- og kryddjurtabollurJá já – Gleðilegt árið kæru vinir og velunnarar þessarar síðu.  Það hefur verið fremur rólegt á þessum miðli, raunar svo rólegt að stundum roðna ég við tilhugsunina. Það eru margar færslur á vinnslustigi, sem stefnt er að ljúka á næstu dögum og vikum.  En hér er ein góð brauðbollu-uppskrift sem Vatnholtsgengið naut þess að snæða sl. sunnudag með dásamlegri gúllassúpu, sem ég er að vinna að færslu um.  Bollur þessar eru ákaflega bragðgóðar og passa vel með góðum súpum eða pottréttum, nú eða bara á morgunverðar- og árdegisverðarborðið með góðu áleggi.

Hráefni í kotasælu- og kryddjurtabollurUppskrift 

  • 4 dl. mjólk
  • 1 bréf þurrger (12 gr.)
  • 1 tsk. hunang
  • 200 gr. kotasæla
  • 1/2 dl. olía
  • 10 dl. brauðhveiti + 1-2 dl til að hnoða upp í deigið eftir hefun
  • væn lúka af ferskum kryddjurtum, t.d. oreganó, tímían, rósmarín og basilika, saxað gróft
  • 1 tsk. salt

Velgið mjólkina í u.þ.b. 37° C, hærið hunangið út í og leysið gerið upp í blöndunni.  Látið standa í 5-7 mín. eða þar til blandan fer að freyða.  Hrærið þá olíu og kotasælu út í.  Bætið hveitinu, kryddjurtunum og saltinu saman við og hnoðið vel saman, deigið er fremur blautt.

kotasaelu-og-kryddjurtabollurLeyfið deiginu að lyfta sér í a.m.k. klukkustund eða þar til það hefur tvöfaldað stærð sína.  Best er að hafa deigið á fremur heitum stað (t.d. með því að setja skálina yfir ílát með heitu vatni í, en gætið þess að skálin standi ekki ofan í vatninu).

Hnoðið smávegis af hveiti saman við deigið, eða þar til þið getið rúllað því í góða svera „pulsu“, skerið í fremur þykkar sneiðar og mótið góðar bollur úr hverri sneið af deiginu.

Setjið bollurnar á bökunarplötu, penslið með mjólk og látið hefast í u.þ.b. 15 mín.

Bakið við 220° C í 10 – 15 mínútur.

img_8928

 

Birt í Árdegisverður (Brunch), Bakstur | Merkt , , | 3 athugasemdir

Vanilludropar – heimagerðir

Þegar ég segi að eitthvað sé einfalt í matargerð þá er stundum hlegið að mér, ég reyni að taka það ekki mjög nærri mér, en núna má sko hlægja.  Það er nefninlega hlægilega einfalt að gera sína eigin vanilludropa og það er um það bil þúsund sinnum betra að nota heimagerða vanilludropa í bakstur og aðra matargerð sem kallar á slíka dropa, en keypta dropa frá ónefndu íslensku átöppunarfyrirtæki.  Svo er líka fáránlega smart að gefa heimagerða dropa í fallegu glasi með einföldu skrauti í jólagjöf, nú eða mæta með slíka flösku í matarboð til góðra vina í staðinn fyrir blómvönd eða bara með blómvendinum.

Litlar fallegar glerflöskur, búsnar vanillustangir, góður vodki og tími er það eina sem þarf – það er tími fyrir dropana til að marenerast vel  og taka gott bragð af vanillunni.  Leikur einn 🙂

Uppskrift 

  • 6 vanillustangir
  • 3-4 dl. vodki

Sótthreinsið* fallegar flöskur – ég notaði 3 flöskur sem hver tekur um 1,2 dl. en nota má bæði minni og stærri flöskur og aðlaga magnið að stærðinni á flöskunum.

Kljúfið vanillustangirnar og skerið þær í tvennt ef flöskurnar eru ekki þeim mun hærri, mikilvægt er að vodkinn fljóti yfir stangirnar í flöskunum.  Stingið 2 vanillustöngum í hverja flösku og hellið vodka þannig að hann fljóti vel yfir stangirnar. 

Fljótlega fer vanillan að lita vökvann og strax á 2. degi má sjá hvernig vökvinn tekur á sig gullinbrúnan lit.  Smátt og smátt verður vökinn dekkri og eftir u.þ.b. 3 vikur er vanilludroparnir tilbúnir til notkunar.  Sjálf fylli ég vodka reglulega á flöskuna án þess að taka upphaflegu stangirnar úr henni, bæti líka vanillu við þegar ég er t.d. að búa til jólaísinn og þarf bara vanillukornin út stönginni – þá sting ég henni út í flöskuna og á þannig alltaf góða vellyktandi vanilludropa – þá bestu sem ég hef nokkurn tíma átt.

Smart jólagjöf fyrir matgæðinga 🙂

Birt í Annað, Vinsælar uppskriftir | Merkt , , , , , , | 3 athugasemdir

Þorskur í tómat- og karrýsósu

Þorskur í tómat og karrýsósu Fljótlegur, fallegur og firnagóður fiskréttur með indverskum blæ. Bragðmikill og ákaflega góður á dimmu desemberkvöldi. Það er þakklátt að uppgötva svona rétti – tala nú ekki um á aðventunni þegar fiskneysla er ef til vill minni en á öðrum árstímum. Á vafri mínu um ansi velskipað matreiðslubókasafn mitt datt ég niður á uppskrift líka þessari hjá vini mínum Hugh Farnley-Whittingstall, breytti henni og stílfærði að smekk og takt við það sem til var í skúffum og skápum. Unglingurinn sem þreytir menntaskóla-jólapróf umlaði af ánægju, betri meðmæli eru vandfundin.

img_8555Uppskrift 

  • 1 msk. olía
  • 1 laukur skorinn fremur smátt
  • 1,5 cm ferskt engifer, rifið á rifjárni
  • 2 hvítlauksgeirar
  • 1 msk. gott karrý (milt madras)
  • 2 msk. tómatpúrra
  • 150-200 ml. kókosmjólk
  • 1/2 tsk. hunang
  • 700 gr. þorskur, eða annar hvítur fiskur
  • safi úr 1/2 lime (eða sítrónu)
  • salt og pipar

Meðlæti og ofan á réttinn

  • gróft söxuð steinselja eða kóríander
  • smávegis af svörtum laukfræjum (Kalonji)
  • Soðin basmati hrísgjón, eða önnur góð grjón

Hitið olíuna á pönnu yfir fremur lágum hita og látið laukinn malla í u.þ.b. 10 mínútur, eða þar til hann er alveg mjúkur og glær (ekki brúna hann).

tomat-og-karry-fiskurBætið rifnu engifer, hvítlauk og karrý út í og hrærið vel saman.  Bætið þá tómatpúrru,  kókosmjólk og hunangi út í, hærið saman. Kryddið með salti og pipar og látið malla við vægan hita í 10 mínútur.

Skerið fiskinn í bita og setjið út í sósuna, látið malla í 2-3 mínútur, snúið fiskinum og látið malla í aðrar 2-3 mínútur eða þar til fiskurinn er eldaður í gegn.  Gætið þess að ofelda fiskinn ekki og munið að hann heldur áfram að eldast eftir að hann er tekinn af hitanum.

Kreystið lime safa yfir pönnuna og blandið varlega saman.

Stráið laukfræjum og gróft skorinni steinselju yfir fiskinn og berið fram með góðum hrísgrjónum.

img_8563

Birt í Fiskur og sjávarfang, Indverskir réttir | Merkt , , , , | Færðu inn athugasemd

Sætkartöflusúpa með indversku ívafi

Sætkartöflu súpa með inversku ívafiBragðmikil og góð súpa á vel við á þessum árstíma.  Dimmt og kalt en oft á tíðum ákaflega fallegt veður.  Tíminn sem það er bæði dimmt er maður leggur af stað í vinnuna á morgnana og líka þegar maður kemur heim á daginn.  Þá er nú ósköp ljúft að kveikja á kertaljósum, hlusta á notalega tónlist og finna hvernig ilmurinn af þessari dásemdarsúpu fyllir íbúðina notalegri angan.

Fyrir þá sem eru vegan, er hér eitthvað fyrir ykkur – sleppið bara að setja jógúrt ofan á hverja skál þegar súpan er borin fram 🙂

Súpa - hráefniUppskrift

  • 2 msk. olífuolía
  • 1 laukur, saxaður fremur smátt
  • 4 hvítlauksgeirar, marðir undir hnífsblaði og saxaðir smátt
  • 4 cm bútur engifer ferskt, rifið á fínu rifjárni
  • 1/2 rautt chili, fræhreinsað og saxað smátt
  • 1 msk. garam masala
  • 2 tsk. madras karrí
  • 2 sætar kartöflur, skrældar og skornar í bita, 2 cm á kant (ca. 700gr)
  • 1 l gott grænmetissoð
  • 1 dós kókosmjólk, 400ml
  • 1 msk. ferskur sítrónusafi
  • Salt og nýmalaður svartur pipar

Ofan á

  • væn msk. af hreinni góðri jógúrt á hverja skál
  • örlítið af grófu söxuðu fersku kóríander eða steinselju

Hitaðu olíuna á góðum súpupotti yfir fremur lágum hita og settu smátt skorinn laukinn út i og látið malla við lágan hita í 10 mín.

img_8362Bættu hvítlauk, engineer, chilli út í og hrærðu saman í nokkrar mínútur.  Bætið þá kryddunum út í, garam masala og karrý, salt og pipar, hrærið vel saman og leyfið að malla í nokkrar mínútur við lágan hita.

img_8367Bætið sætu kartöflunum út í og veltið þeim vel upp úr lauk og kryddblöndunni, svo þær verði þaktar í kryddi.   Hellið grænmetissoðinu út í pottinn, hækkið hitann og látið malla í u.þ.b. 15 mínútur eða þar til kartöflurnar eru alveg meirar.

Takið þá súpuna af hitanum og maukið hana með töfrasprota þar til kartöflurnar eru alveg marðar og súpan silkimjúk.

Bætið kókosmjólkinni og sítrónusafanum út  í og hitið að suðu. Smakkið og kryddið með salti og pipar ef þörf er á.

Berið súpuna fram með smá slettu af hreinu jógúrt og gróf saxaðri ferskri steinselju eða kótíander.

Súpa

 

Birt í Grænmetirréttir, Smáréttir | Merkt , , , | Færðu inn athugasemd