Laufabrauð

Skrifað desember 6, 2014 - Höfundur: Berglindol

LaufabrauðFjölskylduhefðir á aðventu og um hátíðir eru hreint dásamlegar. Ein þeirra sem okkur þykir ákaflega vænt um er sú sem maðurinn minn kom með, nefninlega laufabrauðsbakstur. Móðir hans hún Dísa, elskuleg tengdamóðir mín, hefur allt frá því hún var í foreldrahúsum hnoðað, skorið og steikt laufabrauð. Fyrstu búskaparár okkar Helga fengum við brauðið sent frá Ísafirði, þar sem tengdaforeldrar mínir áttu heima. Rétt fyrir jólin barst alltaf stór kassi með póstinum sem innihélt ýmislegt góðgæti auk jólagjafa. Meðal þess sem í kassanum leyndist var fagurlega útskorið laufabrauð og það merkilega við þessar sendingar var að tengdamóður minni tókst alltaf að búa svo um fallega skorið brauðið að hvert og eitt einasta var heilt. List sem ekki öllum er gefið. Ég er tengdamóður minni þakklátt fyrir margt og meðal annars þess að hafa kennt okkur að útbúa laufabrauð frá grunni eftir gamalli uppskrift sem ég hélt lengi vel að kæmi frá móður hennar – en reyndist rangt – elsku Dísa tók sjálf upp því að baka laufabrauð þegar hún bjó í foreldrahúsum og fann uppskriftina í einhverri gamalli bók.  Nú deilum við þessari dásemdaruppskrift með ykkur sem viljið. Við erum alltaf sannfærð um að þessi uppskrift er sú allra, allra besta og dagurinn sem fer í laufabrauðsbakstur er fjölskyldudagur sem markar upphaf aðventu hjá okkur.
SJÁ UPPSKRIFT

Birt í Bakstur, Brauð, Jól | Merkt , , | 4 athugasemdir

Marmarakaka með aprikósum og súkkulaðibitum

Skrifað nóvember 30, 2014 - Höfundur: Berglindol

MarmarakakaÞað eru ansi mörg ár síðan ég bakaði marmaraköku síðast, en það gerði ég oft þegar ég var unglingur í sveit á sumrin.  Þá bakaði ég formkökur nánast daglega og skemmtilegast fannst mér að baka marmarakökur. Um daginn sat ég á kaffihúsi og gluggaði í bókina Scandinavian Baking og sá þá nýja útfærslu á hefðbundinni marmaraköku – nýjungin felst í því að skera þurrkaðar aprikósur mjög smátt niður og setja í ljósa deigið og súkkulaðibita í dökka deigið – skemmtilegt tvist á gamla og góða uppskrift. Eins og áður hafa gömlu góðu uppskriftirnar þróast mjög – ég tók gömlu góðu uppskriftabókina mína, fann uppskrift af marmarakökunni sem ég bakaði í sveitinni fyrir margt löngu, skipti smjörlíki út fyrir ekta smjör, minnkaði sykurinn töluvert og bætti aprikósum og suðusúkkulaði við.  Útkoman er svo góð að hún verðskuldar færslu – það er alltaf jafn gaman að bera nýbakaða góða köku fram með sunnudagskaffinu.
SJÁ UPPSKRIFT

Birt í Bakstur | Merkt , , , , , | Færðu inn athugasemd

Pavlova með suðrænum tvisti

Skrifað nóvember 16, 2014 - Höfundur: Berglindol

Pavlova með suðrænu tvisiGóð pavlova sómir sér vel á hvaða veisluborði sem er og getur jafnframt verið punkturinn yfir i-ið í lok góðrar máltíðar. Þegar ég gluggaði í Matarást Nönnu Rögnvaldar þá komst ég að því að tertan er áströlsk að uppruna, kennd við rússneska balletdansmær Önnu Pavlovu, sem heimsótti Ástrali árið 1929.  Tertan var þó ekki búin til fyrir Önnu þegar hún dansaði í Ástralíu heldur nokkrum árum síðar þegar matreiðslumaður sem útbjó kökuna vildi gefa í skyn að tertan væri létt eins og Anna og nefndi hana því Pavolvu. Merkilegt nokk þá hefur tertan verið vinsæl æ síðan og útgáfurnar sem til eru af pavlovum eru líklega óteljandi svo margar eru þær – þessi er með suðrænu tvisti – mangó, jarðarberjum, kiví og granateplum.
SJÁ UPPSKRIFT

Birt í Bakstur, Eftirréttir | Merkt , , , , , , | 3 athugasemdir

Sjö klukkustunda sunnudagslæri

Skrifað nóvember 10, 2014 - Höfundur: Berglindol

Sjö klukkustunda sunnudagslæriÉg ólst upp við það sem lítil stúlka og síðar unglingur í sveit að á sunnudögum var nánast undantekningalaust lambahryggur eða lambalæri í matinn.  Eldunaraðferðin var alltaf sú sama. Lærið kryddað vel með salti og pipar, bakað í ofni í rúma klukkustund við fremur háan hita og borið fram með brúnni soðsósu, sykurbrúnuðum kartöflum og Ora grænum baunum. Í minningunni ákaflega ljúffengt og best var þegar svolítill afgangur var af steikinni sem unnt var að nýta í bixi-mat.  Í þá daga var aðalmáltíð dagsins gjarnan í hádeginu, sérílagi um helgar. Þessi hefð hefur ekki haldist – hvorki að hafa aðalmáltíðina í hádeginu né að bjóða upp á lambasteik allar helgar. En aðrar og skemmtilegar hefðir taka við af þeim eldri – undantekningalaust hittum við fólkið okkar um helgar og borðum saman.  Oft eru það síðbúnir árdegisverðir, en stundum sunnudagssteik á laugardags-, eða sunnudagskvöldi. Svo var þessa annasömu Airwaves-helgi. Eldunaraðferðin varð fyrir valinu vegna anna – en hún er ákaflega góð og hentar uppteknu fólki mjög vel.  Sérílagi þegar maður reynir að nýta helgarnar til að gera allt, allt, allt milli himins og jarðar og helst aðeins meira. Þá er gott að stinga steikinni í ofninn áður en haldið er út í daginn, leyfa henni að malla ein síns liðs á meðan farið er í fjallgöngu, sund, hjólatúr, tónleika tja eða #$*% eitthvað allt annað.
SJÁ UPPSKRIFT

Birt í Kjötréttir, Sósur | Merkt , , , , , , , , | 3 athugasemdir

Grænmetis Chili með sætum kartöflum (Chili sin Carne)

Skrifað nóvember 3, 2014 - Höfundur: Berglindol

Chili sin Carne Það fer líklega ekki fram hjá nokkrum manni sem á annað borð les póstana mína á þessum miðli að ég á það til að sækja innblástur til Jamie Oliver þegar ég elda – svo er einnig með þennan rétt.  Í dag dröslaðist ég heim úr vinnunni fyrr en venjulega og ástæðan var ekki mjög ánægjuleg.  Slen og slappleika sem aðeins hafði örlaði fyrir þegar ég vaknaði í morgun magnaðist mjög þegar líða tók á daginn – mér var orðið ansi íllt í hálsinum og fann hvernig kvefpest var að ná yfirtökum. Ég hjólaði heim á leið í þessu fallega vetrarveðri, upp Laugaveginn og kom við í Heilsuhúsinu þar sem ég keypti undradropana Propolish. Þegar heim var komið tók ég líklega fimmfaldan ráðlagðan dagskammt, blandaði út í appelsínusafa og teygaði í einum rikk.  Lagðist undir sæng, svaf í 2,5 klst. og vaknaði öllu hressari. Sannfærð um að sterkur og hollur kvöldmatur væri það besta í stöðunni leitaði ég í smiðju Jamie – þessi réttur er innblásinn af rétti dagsins á heimasíðu hans.  Nánast allt sem til þurfti var til í eldhúsinu.   Með mínu tvisti varð þessi dásemdarréttur til og  verður án efa eldaður aftur.  Þess vegna deili ég uppskriftinni með ykkur – ásamt sögunni af sleninu sem ég mótmælti harðlega – enda komst ég ekki á Austurvöll, en þangað hugðust allmargir samstarfsmenn mínir fara eftir vinnu í dag.
SJÁ UPPSKRIFT

Birt í Grænmetirréttir, Mexikóskir réttir | Merkt , , , , | Færðu inn athugasemd

Kjúklingur með pestó og ricotta osti

Skrifað október 28, 2014 - Höfundur: Berglindol

Kjúklingur með pestó og ricotta

Það er einfaldara en ætla má að útbúa ricotta ost heima í eldhúsi – ég fór á námskeið hjá Salt eldhúsi fyrir stuttu og komst að því og um leið hve skemmtilegt er að útbúa sinn eigin ost, en auk ricotta lærðum við að gera mozzarella.  Ég skelli ef til vill inn færslu fjótlega um einfalda ostagerð – en þangað til, enn einn dásemdar-kjúklingarétturinn og að þessu sinni með ítölsku ívafi.  Þegar ég kom heim af námskeiðinu með fulla dós af ricotta osti – rifjaði ég upp þessa uppskrift. Ég hef nokkrum sinnum eldað þennan rétt, held að ég hafi fyrst stuðst við uppskrift sem birtist í Gestgjafanum fyrir mörgum síðan, en síðan eftir minni og smekk og útkoman hreint afbragð. Það getur verið erfitt að fá ricotta ost á matvörubúðum á Íslandi og þegar hann er til þá er hann svo dýr að maður hikstar aðeins áður en maður tekur ákvörðun um kaupin – en það má nota kotasælu í staðinn nú eða útbúa eigin ricotta. Hér eftir mun ég bara smella í heimagerðan ricotta ost – það er bæði einfalt og frekar fljótlegt.

SJÁ UPPSKRIFT

Birt í Kjötréttir | Merkt , , , , , , , , | Færðu inn athugasemd

Berjaskúffukaka

Skrifað október 19, 2014 - Höfundur: Berglindol

BerjaskúffukakaÞað er ef til vill alger klisja, en ég segi það samt og skrifa. Tíminn líður svo hratt að mér finnst ég varla ná að snúa mér í hálfhring áður en ný vika er komin, nýr sunnudagur. Uppáhaldsdagur vikunna, dagurinn til að njóta, gleðja og samgleðjast.  Auðvitað eigum við að njóta hvers dags, já og þakka fyrir hvern dag, það eru ekki allir sem fá tækifæri til að njóta jafn margra góðra daga og við – klisja já, já …..  og ég skal stoppa núna og snúa mér að því sem skiptir máli á þessum miðli, nefninlega uppskriftinni. Hugmyndina af þessari köku fékk ég við lestur matreiðslubóka hinnar hollensku Yvette Van Boven – breytt og aðlöguð að því sem til var og smekk okkar. Upplagt að skella í hana á laugardags-, eða sunnudagsmorgni – mjúk og góð, hæfilega sæt að mínum mati, en ef til vill vilja einhverjir sætari kökur. Fyrir þá mæli ég með að blanda nokkrum skeiðum af sykri við berjablönduna – sjálfri finnst mér gott að finna ferska og örlítið súra bragðið af berjunum á móti sætum kökubotninum.  Kakan geymist vel í góðu íláti eða í allt að viku.

SJÁ UPPSKRIFT

Birt í Árdegisverður (Brunch), Bakstur | Merkt , , , , , | Færðu inn athugasemd

Heiteykt makríl paté

Skrifað október 12, 2014 - Höfundur: Berglindol

Heitreykt makril patéSunnudagar eru mínir uppáhalds – þá leggjum við áherslu á að eiga gæðastundir með þeim sem okkur þykir vænst um. Oft hóum við í fjölskyldu og vini í árdegisverð.  Í dag tókum við í spil eftir að hafa gætt okkur á ýmsu góðgæti eins og grófu speltbrauði, rauðrófuhummus, ýmsum sultum, ostum, chutney og pestó.  Á meðal nýjunga á borðinu í dag var paté úr heitreyktum makríl sem fékk svo góð ummæli frá gestum dagsins að það verðskuldar færslu hér.  Þetta er ákaflega einföld uppskrift og galdurinn eins og oft áður – gott hráefni.  Heitreykti makríllinn er frá Höfn í Hornafirði og hefur unnið til gullverðlauna á erlendri matarsýningu – hann kaupi ég yfirleitt í Frú Laugu. Ég get enn rölt út í kryddjurtabeðið mitt og náð í ferskar kryddjurtir og nýti það vel – enda stutt eftir að því tímabili.
SJÁ UPPSKRIFT

Birt í Pestó, sultur og chutney, Salat | Merkt , , , | Færðu inn athugasemd

Rauðrófu-hummus

Skrifað október 7, 2014 - Höfundur: Berglindol

RauðrófuhummusÉg hef nokkrum sinnum áður montað mig af garðinum mínum, en hann er ástæða þess að ég keypti íbúðina mína fyrir réttum 10 árum. Í þessum dásemdargarði er nefninlega ágætis aðstaða til að rækta smávegis af grænmeti og kryddjurtum sem við nýtum og njótum til hins ítrasta. Í sumar ræktaði ég nokkrar rauðrófur, þær eru hvorki margar né stórar en þeim mun betri. Tvær fóru í þetta salat hér, tvær í þetta dásemdarhummus og þá eru um það bil fjórar eftir enn úti í garði – ef til vill baka ég þessa súkkulaði- og rauðrófuköku um næstu helgi.

En aftur að uppskrift dagsins, dásemlega bleikur rauðrófuhummus – vel viðeigandi í bleikum október, hollur og nánast syndamlega góður. Ég borða hummus gjarnan ofan á hrökkbrauð eða flatköku, hann er líka góður með grænmeti svo sem ofan á gúrkusneið, vafinn inn í gott salatblað eða með  gulrótum.  Auk rauðrófunnar er eitt einkenni þessarar uppskriftar granatepla þykkni (pomegranate molasses)*, sem er svolítið notað í miðaustulenskri matargerð. Unnt er að nálgast granatepla þykkni í  sérverslunum með austurlenskan mat. Ég keypti mína flösku í verslun á Suðurlandsbraut.  Þetta er dökkur, þykkur, sætur en samt svolítið súr vökvi, unnin úr granateplum.  Ef þið eigið þetta ekki má skipta þessu út fyrir balsamik edik.

SJÁ UPPSKRIFT

Birt í Pestó, sultur og chutney | Merkt , , , , , | Ein athugasemd

Heit ídýfa með þistilhjörtum og spínati

Skrifað október 5, 2014 - Höfundur: Berglindol

Heit ídýfa með þistilhjörtum og spínatiÉg bragðaði ídýfu með þistilhjörtum og spínati fyrst á veitingastað í Pittsburgh þar sem dóttir mín og tengdasonur bjuggu um tíma. Ég heimsótti þau eitt vorið. Við mæðgur hjóluðum einu sinni sem oftar í bæinn, þar sem við vorum búnar að læsa hjólunum og ætluðum að ganga um og skoða bæinn skall á með úrhellis rigningu. Það var góð ástæða til að smella sér inn á næsta veitingastað og panta glas af góðu hvítvíni og einn smárétt. Smárétturinn sem við völdum var heit ídýfa með þistilhjörtum og spínati borið fram með góðum tortilla flögum og grilluðu pítubrauði brotið í litla bita.  Þetta var svo góður réttur að við fórum nokkrum sinnum aftur á hina ýmsu staði og fengum okkur þennan rétt, það þurfti ekki rigningu til.

Þegar heim var komið hófst leit að uppskriftinni á netinu en þar er að finna óteljandi margar útgáfur. Þessi útgáfa er afrakstur nokkurra tilrauna og er upplagður smáréttur í fámenn eða fjölmenn boð þar sem boðið er upp á smáréttarborð eða bara á kósíkvöldi með fjölskyldunni.

SJÁ UPPSKRIFT

Birt í Smáréttir | Merkt , , , , , | Færðu inn athugasemd